Upernaviup Katersugaasivia
Katersugaasiveqarnermut eqqarsaat siulleq pilerpoq sysselråd-ip 1936-mi ataatsimiinnerani. Katersugaasiviup pilersinnissaanut oqallinneq ingerlavoq, ukiulli 16-it ingerlareersut aatsaat katersugasivik pilersinneqarpoq.
Andreas Lund-Drosvad 1927-miilli Kangersuatsiami najugaqartoq katersugaatinik assigiinngitsunik katersisimavoq. 1953-mi politikkikkut aaqqissuusseqqinnerit pissutigalugit sysselråd atorunnaarsinneqarmat ataatsimiittarfiusimasoq atorunnaarpoq. Andreas Lund-Drosvad-ip siunnersuutigaa oqaluffitoqaq katersugaasivittut atuutsinneqalissasoq namminerlu katersani tassani saqqummersinneqarnissaat neqeroorutigalugu, atorfilik Kæmner Knudsen akuersineratigut oqaluffitoqqami aaqqissuussisoqarpoq.
Andreas Lund-Drosvad-ip 1957-mi Upernaviup eqqaa qimappaa, oqaluffitoqqamilu suliani taamaatsiinnarlugit aamma qimallugit, qanorpiaq isikkoqarsimanera nalunaarsuutinik assinillu takussutissaqanngimmat oqaatigiuminaappoq.
1968-mi katersugaasivik ingerlateqqinneqalerpoq Qallunaat Nunaanni katersugaasivissuarmit ilisimatusartut arlallit aallartinneqarput Upernaviup eqqaani eriagisasasnik katersuisussat. Aallartitat ilagaat eskimolog Keld Hansen taassumap Qattarmiuni eriagisassat katersorsimavai naluinaarsorneqareermatalu katersugaasivimmut inissinneqarput.
1979-mi illutoqqat kommunimut tunniunneqarput, kommunillu pielrsaarusiorneranni kulturimut tunngasunut atoreqassasut siunniunneqarluni. 1986-mi kommunip pilersaarusioenerani illutoqqat katersugaasivittut atuutsinneqarnissaat siunniunneqarpoq. 1983-mi Namminersornerullutik Oqartussat aalajangiussimavaat illutoqqat illoqarfimmut pingaaruteqartut eqqissisimatinneqassasut.
Pisiniarfitoqaq 1864-mi sananeqarsimavoq pisiniarfiulli nutaap sananeqarnerata kingorna imaqarani uninngatinneqarsimavoq, niuertup illua 1832-mi sanaaq (siornatigut imerissuni napparneqarsimasoq), napparsivik 1848-mi napparneqartoq kingorna timiusiorfittut atorneqarsimasoq, atuarfitoqaq 1911-mi sanaaq kiisalu palasip illua 1866-mi sanaaq eriagisassanngortinneqarput.
1987-mi illutoqqat nutarsarnissaat pillugu pilersaarusiortoqalerpoq, 1990-kkut aallartinneranni Namminersornerullutik Oqartussat, Skov- og Naturstyrelsen i DK kiisalu Kommuneqarfik Upernavik tapiissuteqarnerisigut nutarsaanerit ingerlanneqartsinnaanngorput. 1997-mi illutoqqanik nutarterinerit ingerlanneqarput. Oqaluffitoqaq, pisiniarfitoqaq niuertullu illutoqaa saqqummersitsivittut atuutsinneqartussanngorput. Palasip illua katersugaasiviup pisortaata inigisassaatut aalajangerneqarpoq, napparsivik eqqumiitsuliortunut inigitinneqartussanngorlugu aalajangiunneqarpoq atuarfitoqarlu toqqorsivittut sullivittullu atorneqartussanngorlugu suliarineqarluni. Ilanngullugu katersugaasiviup eqqaa tamarmi eqqissisimatitassanngortinneqarpoq. Illu niuertup illuanut tunngassuteqartoq peerneqarpoq tassanilu innuttaasut illuat sananeqarluni.
Saqqummersitat: Oqaluffitoqaq sysselråd-ip 1953-mi qimappaa. Tassaniippullu nerrivik issiavittalik, siulittaasup issiavia, allatsit nerrivii ilisiviillu amusartullit sysselråd-ip ataatsimiinnerimi imaqarniliat suliaanullu tunngasunik ilitsiviusartut Pequtit taakku sysselråd-ip ataatsimiittaleqqaarnerani atorneqarput, sanasumit Hans Jørgensen-mit sananeqarlutik. Pequtillu taakku ataatsimiittarfiusimasup saqummersinneqarnerani pingaaruteqarput. Nerrivimmi iikkamilu takuneqarsinnaapput katersugaatit assigiinngitsut 1968-mi Qallunaat Nunaannit eriagisassanik misissuisimasut nassaavi, ilisivinniitinneqarsimapput pulaartunit attoqqusaanngitsut niaqqullu saarnga. 1997-mi sysselråd-ip ataatsimiittarfianut attuumassuteqanngitsut piiarneqarput. Isertarfimmi pattagiarsuaq takuneqarsinnaavoq Upernaviup oqaluffiata 1927-miit atorsimasaa.
Pisiniarfitoqqami umianut qaannanullu inissaqarluarpoq, oqaluffitoqqatuulli kiassagaanngilaq, taamaattumillu umianut qaannanullu saqqummersitsivittut piukkunnarluni. 2006-mi saqqummersitat piniarnermut tunngasunik ilisimasanik ilaneqarput.
Niuertup illuani saqqummersitsiviit kiassagaapput, tassani allanngorartumik saqqummersitsisoqartarpoq, qaliani katersugaasivik allaffeqarlunilu kiosk-eqarpoq.
Eqqumiitsuliortut inaat siullermeerluni 1997-mi Qallunaat nunaanneersumik tikeraarneqarpoq, ilinniartitsisunngorniatut ilinniartoq tassani tikeraarsimavoq eqqumiitsulianillu suliaqarluni. Ukiut ingerlanerini assigiinngiotsorpassuarnik nunani tamalaaneersunik tikeraartoqartarpoq. Kommuneqarfik Upernavik (2009-miit Qaasuitsup Kommunia) ingerlanneqarneranut kikkullu tikeraartuussanersut aalajangiisarpoq, tikeraartut tamarmik suliarisimasaminnik katersugaasivimmut tunissuteqartarput. Tikeraartut ilaat suliaminnik saqqummersitsisarlutik atuarfinnilu workshop-nik aaqqissuussisarlutik.
Katersugaasivik 2009-mi aasakkulli pisortaqartinneqanngilaq.