Refugium Upernavik-mut malittarisassat

§1 stk. 1Anersaakkut eqqumiitsuliornikkullu pikialaarfiup, Refugium Upernavik-up siunertaraa eqqumiitsuliortoq imaluunniit eqqumiitsuliortunut hold-it amerlanngitsukkaartut, periarfississallugit eqqissillutik suliaminnik sammisaqarsinnaanissaat.
 

Stk. 2   Upernaviup Katersugaasivia anersaakkut eqqumiitsuliornikkullu pikialaarfik, Refugium Upernavik aqqutigalugu eqqumiitsuliortoq eqqumiitsuliaalu aallaavigalugit suliffigisinnaasaannik ineriartortitsiniarpoq.
 

Stk. 3   Upernaviup Katersugaasivia najukkami katersugaasiviugami ineriartortitsiniarpoq, piorsarsimassutsikkut pinngortitamilu avatagiisitigut isumassarsiffiusinnaasumik.
 

Stk. 4   Kalaallit Kulturiat pinngortitarlu tunngavittut isumassarsiffittut aallaavigalugit, takuuk §1, stk. 3            kissaatigineqarpoq eqqumiitsuliortunit nunarsuarmiut tamanit orninneqarsinnaasumik eqqumiituliortunut suliffiliortoqassasoq.

§2 stk.1Anersaakkut eqqumiitsuliornikkullu pikialaarfik, Refugium Upernavik B-11-mi timiusiorfikumi illutaqarpoq.
 

Stk. 2   Illu B-11 Upernaviup Katersugaasivia-nit pigineqarpoq.
 

Stk. 3   B-11 Katersugaasiviup sulisuinit sissuerneqarpoq.

§3 stk. 1Anersaakkut eqqumiitsuliornikkullu pikialaarfimmut, Refugium Upernavik-mut qinnuteqaatit allakkatigut pisassapput – kalaallisut – danskisut tuluttulluunniit allallugit nassiunneqassallutillu uunga:

Upernaviup Katersugaasivia
Box 93
3962 Upernavik

Imaluunniit : inussuk@greennet.gl

Stk. 2   Qinnuteqaammut ilanngunneqassapput qanoq eqqumiitsuliortarneq, eqqumiitsuliorneq suna atornerlugu, aammalu imminullu oqaluttuarineq.
 

Stk. 3   Qinnuteqarnissaq killeqanngilaq, qinnuteqaatit ataavartumik isummersorfigineqartassammata.
 

Stk. 4   Eqqumiitsuliortut qinnuteqartut akornanni katersugaasiviup siulersuisui aalajagiisassapput Katersugaasiviup pisortaata innersuussinera naapertorlugit
 

Stk. 5   Qinnuteqartut nunamit suminngaanneerneri tikkuaanermi apeqqutaatinneqartassanngillat, takuuk §1, stk. 4.

§4 stk. 1   Ineqarnermut akiliutit, qulliit, kiassarneq, anartarfiit eqqaaviillu Upernaviup Katersugaasivianit akilerneqartasapput.
 

Stk. 2   Upernaviliarnermut uternermullu angalanermut atatillugu akiliut Upernavimmiinnermilu aningaasartuutit eqqumiitsuliortumit imminermit akilerneqartassapput.
 

Stk. 3   Ulloqartariaqarpoq innuttaasunut tamanut ammasumik, katersugaasiviup pisortaa isumaqatigalugu aaqqissuunneqartumik, eqqumiitsuliortup ulluinnarni sulisarneranik takutitsiffiusinnaasumik.
 

Stk. 4   Upernavimmiit aallarnermit kingusinnerpaamik qaammatit arfinillit qaangiunneranni, eqqumiitsuliortoq suliaminik ataatsimik Upernaviup Katersugaasivianut tunniussissaaq Refugium Upernavimmiinnerminut atatillugu suliarisimasaminik. Suliaq Refugium Upernavik-mi nivinngarlugu imaluunniit allatigut saqqummersinneqassaaq.
 

Stk. 5   Immikkut pisoqartillugu, soorlu atuakkiortut taalliortut pillugit, katersugaasiviup siulersuisui §4, stk. 4 pillugu immikkut akuersissuteqarsinnaapput.