Maniitsup Katersugaasivia / Maniitsoq Museum
Illunnguit 11
3912 Maniitsoq
Kalaallit Nunaat / Grønland
Maniitsup Katersugaasivia
25. oktober 1974-imi kingusinnerusukkut katersugaasivimmi pisortanngortup Thomas Petrussenip - Maniitsup kommunimi katersugaasiveqarnermut ataatsimiititaliaa sinnerlugu - siusinnerusukkut kæmnerip allaffigisimasaanut Imeqvej B-210-imi Maniitsup Katersugaasiviata ammarneqarnerani ammaanersiorluni nalliuttorsiornermut tikilluaqqusivoq. 1974-ip siornatigut katersugaasiveqarnermut ataatsimiititaliap illoqarfiup katersortarfia saqqummersitsinermut atortarsimagaluarpaa.
Maniitsup Katersugaasiviata maannamut inissisimaffini 12. januar 1980-imiilli atorsimavaa. Iliveqarfiup Qooruani nunaminertamiinnissaanik eqqarsaat - ullumikkut Maniitsup Katersugaasiviata inaani - katersugaasiviup nunatassaatut inniminneerneqarnissaa 1970-ikkunnili piulersimavoq.
Niuvertoqarfimmi illutoqqat 4-t ukiu 1800-kkut affaannit kingullermeersut ullumikkut katersugaasiviup inissisimaffigisaaniittut 1970-imi umiarsualivimmii inissisimaffitoqqaminniit ingitserneqarlutik piiarneqartariaqarsimapput illoqarfiup aalisakkeriviata allilerneqarneranut atatillugu. Kommunalbestyrelsip kissaataa malillugu iluarsartuullugu pilersaarusiaq suliarineqarpoq Iliveqarfiup Qooruata nunaminertaani illuliat 4-t sanaqqinneqartariaqarnerannut atatitsisumik, tassa Maniitsumi illuliat marlussuit imaluunniit 4-t tamakkerlugit Illorsuatoqqat kulturikkut pingaaruteqarsimasut katersugaasivittut Nunatta Katersugaasiviata Nuummiittup eqqaani sanaqqinneqarnissaannik eqqarsaat alla akerliuffigineqarmat.
Tamanna pillugu qallunaat illussanik titartaasartut marluk, Peter Hee aamma Jørgen Jessen, 1970-imi Københavnimiit Maniitsuliarput uuttortarlugillu nalunaarsoriartorlugit kingusinnerusukkut sanaqqinneqarnissaat siunertaralugu, ilaatigullumi illorsuit B-16 piiarneqarnissaat toqqorneqarnissaallu siunertaraluguttaaq (niuertussap illua (quassuttuut qaleriiaarlugit illumut ikkussukkat, illu quleriinnik sisamanik inilik)), B-25 (pisiniarfitoqaq quersuarlu (illu saarni katitikkat)), B-28 (napparsivik (ujaqqanik qarmagaq)) aamma B-56 (suliffik (ujaqqanik qarmagaq)) nakkutigiartorlugit. Taamaaliortoqannginnerani KGH-p illorsuit qimappai.
Maniitsumi pilersinneqarpoq "Maniitsumi niuertoqarfiup illutoqaasa 4-t sanaqqinneqarnissaannik ataatsimiititaliaq", pilersinneqarnerminiillu illorsuit nappaqqinneqarnissaannik sulissuteqarpoq. Illorsuit 1970-ikkut naajartorneranni sanaqqinneqarput Illunnguani Iliveqarfiup Qooruani. 1977-ip ingerlalernerani illorsuit siulliit atoqqinneqarsinnaalerput. Niuertussap illorsua B-16 inissiatut iluarsaanneqarpoq, nerisassanik nioqquteqartarfik B-25 atuagaateqarfinngortinneqarluni, ujaraannarnik qarmagaq illu aappaluttoq B-28 kiassaateqarfittut aaqqissorneqarluni il. il. naqqaniilli qarmarlugu illuliaq qaqortoq B-56 illoqarfiup katersugaasiviatut aaqqissuunneqarluni, oqaatigineqartut 12. januar 1980-imi atoqqaartinneqarluni.
Katersugaasivilli 1980-ikkut naajartorneranniit katersugaatit - ammit atisat, qaannat pisataat, pattagissat, eqqumiitsuliat allarpassuillu - tamakkerlugit inissaqartinnissaannut ajornartorsiuteqalerpoq - ukiullu ingerlaneranni illorsuit sisamat tamarmik Maniitsup Katersugaasiviatut atulerlutik. Illorsuaq kingulleq ilanngunneqartoq tassaavoq B-25, 2010-p tungaanut illoqarfiup atuagaateqarfiatut atorneqartoq, tamatumalu kingornatigut kommunip allaffqarfiani ininut nuunneqartoq. Illorsuit sisamat tamarmik ullumikkut allanngutsaaliugaallutik eqqissisitaapput.
Maniitsup Katersugaasivia ukiut ingerlaneranni inunnit akimasuunit pingaaruteqartunillu pulaartoqartarpoq. 1993-imi taamaattunut ilaapput statsministeriusimasoq Poul Nyrup Rasmussen aamma Naalakkersuisut siulittaasuat Lars Emil Johansen. Kingullerpaajullutik 2015-imi katersugaasivimmik takuniaapput Ataqqinartorsuit Dronningerput uialu.